Թվային անորակ կցորդ սարքերն իսկական պատուհաս են բնակիչների համար, թեպետ պատասխանատուն հակառակն է պնդ

MAMUL.am-ը գրում է.

Պարզվում է` թվային հեռարձակմանն անցնելու գործընթացն այնքան էլ հեշտ չէ և քաղաքացիները բազմաթիվ խնդիրների են բախվում:

MAMUL.am-ի թղթակցին դիմած բնակիչները գանգատվեցին, որ պետության կողմից տրամադրված և երևանյան խանութներում վաճառվող ընդունիչ սարքերը անորակ են: «Մի շաբաթ առաջ եմ գնել. ընդամենը 2 օր աշխատեց, վերադարձրեցի, նորը բերեցի, էլի թերություններ ունի, հեռուստացույց դիտել հնարավոր չի»,- ասաց նրանցից մեկը:

Ի դեպ, քաղաքացիներին անհանգստացնում են նաև թվային ընդունիչների գները, որոնք տարբեր խանութներում տարբեր արժեք ունեն: Սակայն նրանց ամենից շատ զարմացնում է այն հանգամանքը, որ վերջին ամիսներին դրանց գներն անհամեմատ բարձրացել են. «Երբ հայտարարվեց թվային հեռարձակման անցնելու մասին և այդ սարքերը հայտնվեցին վաճառքում, բավականին էժան էին` 5 000-6 000 դրամ: Հետո, երբ արդեն ժամանակ չմնաց և մարդիկ ստիպված պետք է գնեին այդ ընդունիչները, որպեսզի անցնեին թվայինին, ոչ մի տեղ այդ գնով չէր գտնվում: Այսօր էլ խանութներում ընդունիչ սարքերը վաճառվում են` սկսած 9 000-ից մինչև13 000 դրամից»,- պատմում էին նրանք:

Նար-Դոս-Գնունի փողոցների վրա գտնվող էլեկտրոնիկայի վաճառքով զբաղվող մի շարք խանութներում 9 000 դրամից պակաս ընդունիչ սարք հնարավոր չէ գտնել: Վաճառողներն էլ, մեր թղթակցի հետ զրույցում նշեցին, որ ամենամատչելի գներն իրենք են առաջարկում. «Փորձնական ուրիշ խանութ գնացեք` կտեսնեք, թե ինչ թանկ են վաճառվում դրանք… շատ տեղերում նույնիկ 15 000-17 000 հազարի են հասնում այդ սարքերը»,- ասացին նրանք:

Սպառողների ասոցիացիայի նախագահ Արմեն Պողոսյանը MAMUL.am-ի թղթակցի հետ զրույցում` անդրադառնալով Հայաստանում վաճառվող թվային կցորդ սարքերին և դրանց որակին, ասաց` քանի որ դրանք չունեն երաշխիք, ուստի դրանց վաճառքը հանցավոր է: «Ազգաբնակչությունը զրկված է որակյալ ծառայություն ստանալուց: Որակը հաստատող տեսչությունը պարտավոր է բացահայտել, թե որտեղից են թվային կցորդ սարքերը հայտնվել այստեղ, ինչու չունեն սերտիֆիկացում»,- ասաց Ա. Պողոսյանը` նշելով, որ անալոգային հեռարձակման անջատումից հետո բնակչության կողմից բազմաթիվ ահազանգեր են ստացել` ընդունիչ սարքերի, հեռարձակման որակի, անվճար տրամադրվող սարքերի և մի շարք այլ խնդիրների շուրջ:

Մեր զրուցակիցն ասաց, որ այդ խնդիրը բարձրացրել է նաև վարչապետի մոտ, ով բավականին վրդովվել է ստեղծված իրավիճակով և տվել մի շարք ցուցումներ:

Մանրամասները սկզբնաղբյուր կայքում

#Հասարակական