«Մտածեցի, որ մահացել եմ՝ կարդալով լրագրողների գրածը». Հռիփսիմե Խուրշուդյան
- Zohrap Amiryan
- 24 нояб. 2016 г.
- 1 мин. чтения

Նոյեմբերի 21-ին հայտնի դարձավ, որ 2012-ի Լոնդոնի օլիմպիական խաղերի բրոնզե մեդալակիր ծանրորդուհի Հռիփսիմե Խուրշուդյանը որակազրկվել է և պետք է վերադարձնի բրոնզե մեդալը։ Այսօր լրագրողների հետ հանդիպման ընթացքում Եվրոպայի գործող չեմպիոնուհին նշեց, որ թեև չի ցանկանում, բայց ստիպված է դա անել՝ օրենքին հետևելով։
«Ճիշտն ասած` ինձ եթե մնա, չեմ վերադարձնի, բայց օրենքին հետևելով, եթե ուզեն, պետք է վերադարձնեմ։ Քանի դեռ ժամկետի շուրջ որոշում կայացրած չէ, շարունակելու եմ մարզումներս, մինչև որ հայտնի դառնա, թե ինչ է լինելու։ Տեսնենք` որակազրկման ժամկետն ինչքան կլինի։ Եթե 10 տարով որակազրկեն, ինչ իմաստ ունի մնալու։ Բայց շատ եմ ուզում շարունակել»,- Հռիփսիմեի խոսքերն է փոխանցում MAMUL.am-ի թղթակիցը։
Հռիփսիմեն նշեց նաև, որ վիրավորված է լրագրողների վերաբերմունքից.
«Ցավ եմ ապրում, որ մեր հարգելի լրագրողները միայն վատ լուրն են արագ տարածում։ Այնպես են գրում, կարծես մի բառ է պակասում, ցանկանում են գրել «Հռիփսիմե Խուրշուդյանը վերջապես որակազրկվեց»։ Չի կարելի նման բան գրել, չէ որ մարզիկները ձեր ոգևորության կարիքն ունեն։ Ինչո՞ւ չեք նշում, որ Հռիփսիմե Խուրշուդյանը Եվրոպայի գործող չեմպիոն է։ Մեր մարզուհուն պետք է ոգևորել։ Երեկ կարդում եմ, մեկը գրել է․ «Շտապ, վատ լուր․ ծանրորդուհի Հռիփսիմե Խուրշուդյանի հետ ամբողջ ազգն է վատ տանում»։ Ես մտածեցի, որ մահացել եմ։ Պետք չէ նման կերպ վերաբերվել և նման նյութ տեղադրել»։
Մանրամասներն այստեղ
Comments